Хатылынская модельная библиотека

Эр киһи, эр бэрдэ айылҕаттан айдарыылаах сибээстээх,  түҥ былыргыттан илдьэ кэлбит төрүт дьарыкпыт!

2012 сыллаахтан, Саха Республикатын Президенин ыйааҕынан муус устар бастакы өрөбүл күнүгэр булчут күнэ бэлиэтэнэр.

Булт – аҥардас кыыллары сонордоһуу, өлөрүү — өһөрүү эрэ буолбакка, бу, бастатан туран, айылҕаны кытта ситим, эти-хааны, өйү-санааны чэбдигирдии уонна чөл олох төрүтэ буолар. Өбүгэлэрбит ити муудараһы тутуһан, бу уустук идэни баһылыырга үйэлэр тухары үтүө үгэстэри муспуттара, айылҕаны харыстыыр айыы санааны иитиэхтээбиттэрэ.

Сааскы кус болдьоҕо чугаһаата

Күүтүүлээх сааспыт тиийэн кэллэ. Уһун кыһынтан сылайа быһыытыйбыт дьоҥҥо үөрүүнү бэлэхтээтэ. Ол эрээри, бу кэми ордук булчуттар кэтэһэр буолуохтаахтар. Онтон бултка тэринии балачча түбүгү эрэйэр, ороскуота да кырата суох буолааччы. Ханна да ас-таҥас, мал-сал сыаната лаппа ыарыы турар. Ол да буоллар, булт диэн баран “муннукка ытаабыт” дьон ону аахсыбакка син биир айылҕаҕа, булка талаһаллар.

Бэрт сотору, муус устар 25 күнүттэн ыҥырар кустаах (подсадная утка) дьоҥҥо сааскы кустааһын кэмэ саҕаланар.

Ол эмиэ кэккэ быраабылалаах. Ону билиһиннэрэр буоллахха маннык:

1. Биир ыҥырар тыһы куска икки киһи көҥүллэнэр. Икки тыһы кустаах буоллаххына түөрт буолан олоруоххутун сөп. Атыыр куһу тэҥинэн илдьэ сылдьар көҥүллэнэр, ол эрээри, ыҥырар кус быһыытынан тыһыта эрэ ааҕыллар.
2. Куһа суох кыттыгас киһи эмиэ ыҥырар куска көҥүллээх буолуохтаах. Бултаабыт бултарын күн аайы эбэтэр биир сырыыларыгар икки-үс күннээхтэрин дьиэлэригэр айанныахтарын иннинэ көҥүллэрин (лицензия) хас күн бултаабыттарын үллэстэн, биир киһи бэйэтигэр толоруохтаах.
3. Айан кэмигэр охотинспектор, эбэтэр ГАИ бэрэбиэркэлиир буоллаҕына, ол кэмнээх, күннээх ыҥырар куһу бултаабыт толоруллубут көҥүлү (лицензия), булткун, саа докумуонун көрдөрүллүөхтээх. Куһа суох кыттыгас киһи буоллаҕына, ол кэмнээҕи, күннээҕи фото-видео көрдөрдөҕүнэ сөп буолар. Атын эргэ түһэрии уонна бултаан иһэр куһун ахсаана элбэх, көҥүлүгэр бэлиэтэммит суруга сөпсөспөт буоллаҕына булт быраабылатын кэһии буолар.
4. Сааскы бултааһын кэмигэр биир булчут уопсайа 30 кустан элбэҕи бултуо суохтаах, уопсай кустааһын уонна ыҥырар куһунан бултааһын болдьоҕун ааҕан туран.

Барыгытыгар байанайгыт тосхойдун!