“Чэчирии, тупса тур Хатылым!”
Дойду үрдүнэн сыл аайы “Маһы олордуу бүтүн Арассыыйатааҕы күнэ” экологическай аахсыйалар ыытыллаллар. Бу хамсааһын 2011 сыллаахха Ойуур хаһаайыстыбатын Федеральнай аҕыаныстыбатын көҕүлээһининэн саҕаламмыта. Итиэннэ кулун тутартан саҕалаан бэс ыйыгар тиийэ Арассыыйа үрдүнэн далааһыннаахтык ыытыллар үтүө үгэстэммитэ.
Ханнык баҕарар нэһилиэнньэҕэ сүрүн соругунан дьон олорор усулуобуйатын тупсарыы буолар. Маныаха нэһилиэк тас көстүүтэ, ол эбэтэр тэрилтэлэрбит дьиэлэрэ, уопсастыбаннай сынньанан ааһар сирдэрбит, биллэн турар, эмиэ оруолу ылаллар.
Хатылы нэһилиэгэр өр сылларга баһылыгынан үлээбит, Улуус мунньаҕын депутата Ульяна Николаевна Атласова нэһилиэк эдэр ыалларын бу дьоһун хамсааһыҥҥа көҕүлээн барыта биэс уонча маһы олордуу үөрүүлээх чааһа ыам ыйын 29 күнүгэр Кыайыы искибиэригэр ыытылынна.
Быйыл дойдубут үрдүнэн Улуу Кыайыы 80 сыла, Өрөспүүбүлүкэбитигэр Аҕа дойдуну көмүскээччи сыла, Чурапчы улууһа тэриллибитэ 95 сыла, Хатылыбыт нэһилиэгэр Аҕа сыла биллэриллибитинэн Сүгүрүйэр ытык дьоммут өйдөбүнньүк Кыайыы искибиэрин уонна В.С.Соловьев- Болот-Боотур аатынан Хатылы орто оскуолатын, “Ньургуһун” уһуйаан территорияларыгар мастары олордуу тэрилиннэ.
Мас олордуллан, сотору кэминэн хойуутук, өлгөмнүк үүнэн тэнийиэ. Бары биир санаанан турунан, Хатылыбыт чэчирии тупсарын, үнүгэстэр үүнэллэрин туһугар маннык үтүө аахсыйаҕа кылааккытын киллэрбиккитигэр махтанабыт! Олорор нэһилиэкпит чэчирии, тупса туруохтун!
