Балаҕан ыйын 3 күнэ- Терроризмы утары сомоҕолоһуу күнэ.
Бу күн Беслаҥҥа, Буденновскайга, Москваҕа, Дубровкаҕа, «Крокус Сити Холлга», онтон да атын сирдэргэ буолбут терракт сиэртибэлэрин кэриэстиир бэлиэ күн 2005 сыллаахха «Россия албан аатын күннэрэ» федеральнай сокуонунан бигэргэммитэ. Даата олохтонуутугар 2004 сыллаахха балаҕан ыйын 1 күнүгэр, Хотугу Осетия Беслан куоратын 1 нүөмэрдээх оскуолатыгар буолбут террористар саба түһүүлэрэ сабыдыаллаах. Биллэрин курдук, оскуолаҕа буолбут быһылааҥҥа террористар 1128 киһини 3 күн устата тутан олорбуттара. Ол түмүгэр 314 киһи, олор истэригэр 186 оҕо суорума суолламмыта, 800 тахса киһи араас эчэйиини ылбыта. Бу алдьархайы бүтүн Арассыыйа норуота хаһан даҕаны умнубат.
Терроризмы утары сомоҕолоһуу күнүгэр дойду үрдүнэн террактар сиэртибэлэрин, бэйэлэрин олохторун толук уурбут быраабы араҥаччылыыр уорганнар үлэһиттэрин кэриэстээн Хатылы нэһилиэгин библиотекатыгар Арассыыйаҕа терроризмы утары сомоҕолоһуу күнүгэр аналлаах аахсыйа быыстапката турда.
