Күн курдук күндү Ийэ. Хатылы нэһилиэгэр Ийэ күнүн декадата.
Алтынньы ый 3 баскыһыанньата Саха сиригэр — Ийэ күнүнэн бэлиэтэнэр. Ийэ күнүгэр анаммыт декада чэрчитинэн нэһилиэкпит иһинэн бэрт сэргэх тэрээһиннэр буолан аастылар. Ол курдук, түөлбэлэр икки ардыларыгар 8 төгүлүн ыытыллар «Дахталлар спартакиадалара»Поповтар ааттарынан спорт саалатыгар ыытылынна. Күрэхтэһээччилэр хары баттаһыы, сыал ытыы, хабылык, керн-хол, канаат тардыһыы курдук көрүҥнэргэ кыахтарын холоннулар, илин -кэлин түһүстүлэр.Бу күн «Далбар» дьахталлар түмсүүлэрэ кэлбит кыттааччылары, көрөөччүлэри сахалыы сылаас саламаатынан, арыылаах алаадьынан айах тутан күндүлээтилэр. Ийэлэргэ анаан «Ситим» НАДЬ уонна олохтоох бэбилитиэкэ үлэһиттэрэ тупсаҕай көстүүлээх «Кенди -бар» уонна фотозона оҥорон көрүстүлэр. Атыы-тутуу дьаарбанката тэрилиннэ.
«Кыыс анала-Ийэ буолуу» тэрээһин олохтоох бэбилитиэкэ дьиэтигэр буолла. Ийэ буолар өйдөбүл кыыска кыратыттан бэриллэр. Кэлин таптала даҕаны ол таһымынан дабайан киэҥ ис хоһооннонор. Оскуола улахан кылааһын кыргыттарыгар туһалаах бэсиэдэ ыытылынна. «Алгыс» эбээ түмсүүтэ сиэлтэн уонна кылтан оҥоһуллубут бэйэлэрин өбүгэлэрин оҥоһуктарын аҕалан быыстапка туруоран кэпсээтилэр, сылгы сиэлин хатан ситии оҥоһуутугар маастар кылаас ыыттылар.
Ону тэҥэ, бэйэ сэбэрэтин тупсарыыга тэттик сүбэлэр, «Кун курдук күндү Ийэ» кинигэ быыстапката турда, «Ыл, тик, кэт» аҕыйах чаас иһигэр дьиэҕэ кэтэр таҥас тигиитигэр эдэр ийэлэргэ маастар кылаас ыытылынна.
