Муҥха — саха омуга устар уһун үйэлэр усталарыгар чочуллубут дириҥ үгэс.
Баай Байанай иччилээх сэтинньи ый ортолоото. Сэтинньи — кыһыҥҥы ый. Бу ый дэлэй астаах, хаһаастаах. Ол аата саха дьоно кыстыкка бэлэмнэнэн идэһэлэнэр, муҥхалыыр, бултуур.
Былыр муҥха ханна, хаһан буоларын дьон эрдэттэн истиһэн, ыраах сирдэртэн атынан айаннаан, хонуктуу сылдьан бултаан, кыстыыр аһы-үөлү хааччынар уонна сынньанар буолара. Муҥха иннинэ эбэлэрин иччитигэр көмүс хатырыктааҕынан күндүлүүрүгэр көрдөһөн Байанайга уонна Күөх Боллоххо саха мааны аһынан айах туталлара. Муҥха тэрээһинин кытаанах ирдэбиллэрин, сиэрин-туомун булгуччу тутуһаллара.
Быйыл Хатылыга Аана алааһа, Ханньаахы, Харбала, Имигиттэ күөллэригэр нэһилиэк Муҥхалара тэрилиннилэр. Муҥхаҕа кэлбит дьон ким тугу сатыырынан үөрэ-көтө, сымсатык туттан көхтөөхтүк үлэлээтилэр. Улахан дьону кытта оскуола саастах оҕолор эмиэ тэҥҥэ сылдьыһан аҕа көлүөнэттэн саха омук сатабылыгар үөрэнэллэрэ, бултка, балыкка сысталлара элбэҕи эрэннэрэр.
Муҥха түспүт эбэтэ кэлбит дьону маанылаата, Күөх Боллох тойон “мичик” гынна, бэрткэ диэн бэристэ. Куруук бу курдук үөрдэ, көмүс хатырыктааҕыттан күндүлүү турдун!
