Бойобуой Албан аат түмэлигэр Хатылы нэһилиэгин быыстапката.
И.М.Павлов аатынан Чурапчытааҕы Бойобуой Албан аат түмэлигэр Улуу Кыайыы 80 сылыгар анаммыт «Албан ааттара өлбөөдүйбэт!» нэһилиэктэр быыстапкаларын Хатылы нэһилиэгэ салҕыыр. Ол курдук, бэҕэһээ, ахсынньы 4 күнүгэр, Кыайыыны уһансыбыт биир дойдулаахтарбыт тустарынан кэпсиир, кэриэстиир, үйэтитэр сыаллаах быыстапка арыллыыта буолла.
Быыстапканы арыйыыга Чурапчы улууһун баһылыгын социальнай боппуруостарга солбуйааччы М.Ф.Кронникова, «Хатылы нэһилиэгэ» тыа сирин түөлбэтин баһылыга В.Е.Попов, А.А.Саввин аатынан Чурапчытааҕы история уонна этнография түмэлин дириэктэрэ А.А.Захаров, «Бойобуой Албан аат» түмэл салайааччыта М.В.Дьячковскай тыл эттилэр.
Биһиги нэһилиэктэн 136 туруу үлэһит дьон уоттаах сэриигэ барбыттара, кинилэртэн 22 киһи үлэ фронугар сылдьыбыта. Кыа хааннаах кыргыска 69 буойун төрөөбүт түөлбэлэригэр эргиллэн кэлэр дьолу билбэтэхтэрэ, көмүс уҥуохтара үйэ-саас тухары сэрии толоонугар хаалбыта. Оттон 67 буойун дьиэлэригэр тыыннаах ордон кэлэр үөрүүнү билбиттэрэ.
Сэрии суостаах сылларын историятын, Аҕа дойду Улуу сэриитин кыттыылаахтарын, Ийэ дойду көмүскэлигэр араас кэмнэрдээҕи бойобуой дьайыыларга кыттыбыт биир дойдулаахтарбыт тустарынан Хатылытааҕы «Көһөрүллүү» түмэлин салайааччыта М.В.Чичигинарова сиһилии кэпсээтэ.
Аҕа дойду Улуу сэриитин кыттыылааҕа И.П.Козлов-1 төрөппүт кыыһа Прасковья Ивановна аҕатын уонна чугас дьонун бойобуой суолларын сырдатта.
Чурапчы олохтоохторун, биир дойдулаахтарбытын эйэ иһин олохторун толук уурбут , Улуу Кыайыыны уһансыбыт саллааттарбыт, Афганистан, Чечня конфликтарыгар кыттыбыт буойуттарбыт уонна Анал байыаннай дьайыыга кытта сылдьар ыччаттарбыт ааттарын үйэтитэр, кэриэстиир быыстапканы кэлэн көрөргүтүгэр ыҥырабыт!