Кулун тутар 6 күнэ- Глаукоманы утары аан дойдутааҕы күн.
Кулун тутар 6 күнэ аан дойдуга Глаукома ыарыытын (харах ыарыыта) утары күнүнэн бэлиэтэнэр. Бу күҥҥэ анаан Е.Д.Доҕордуурап аатынан олохтоох бэбилитиэкэҕэ «Глаукома- уодаһыннаах ыарыы» туһунан кинигэ быыстапкатын, Өрөспүүбүлүкэбит биллэр быраастарын сүбэлэрин брошюратын ылынын, көрүҥ, ,туһанын диэн ыҥырабыт.
ГЛАУКОМА диэн харах дабылыанньатын тахсыытын ааттыыллар. Бу ыарыы уратыта диэн киһи үксэ ыалдьарын билбэт, көрбүтүн курдук көрө сылдьар. Биирдэ эмэ хараҕа туманнырарын, ууланарын улахаҥҥа уурбат. Ыарыы биллэрбэккэ тарҕаныан сөп. Киһи көрөрө мөлтүүр, болҕомтото сүтэр, хараҕын онно ыалдьар. Улаата турар дабылыанньа харах сүрүн ньиэрбэтин өлөрөн кэбиһэр. Маны кэмигэр эпэрээсийэлэтэн, эмтэнэн оннугар түһэрбэтэххинэ, харах көрбөт буолуон сөп.
Ыарыы дойду хайа баҕар муннугар олус тарҕаммыт. Ордук 50 тан тахсыбыт саастаах дьон ыалдьаллар эрээри, кэлин эдэрдэр да ыалдьаллара үрдээбитэ бэлиэтэнэр. Статистика көрдөрөрүнэн, чуолаан дьахтар аймахха киэҥник тарҕаммыт.
Онон кэмиттэн кэмигэр харах бырааһыгар көрдөрүнэр оруннаах. Олох кырааскатын толору көрөргө доруобай харах улахан оруоллаах. Хараххытын харыстаан, глаукомата суох олоҕу талыҥ.
