Хатылынская модельная библиотека

Аҕа дойдуларын туһугар өстөөҕү кытары кыргыһыыга олохторун толук уурбут, эйэлээх олох кэлэрин тыылга уһансыбыт уонна сэрии кэнниттэн олох тупсарын туһугар туруулаһан үлэлээбит ытык дьоммутугар сүгүрүйүү бэлиэтэ — Кыайыы Знамята — Улуу Кыайыы 80 сылын көрсө историческай эстафета Чурапчыбыт улууһугар икки күн устата ыытылынна, барыта улууспут 17 нэһилиэгин сиригэр-уотугар үөрүүлээх миитиҥнэр тэрилиннилэр.

— Улуу Кыайыы Кыһыл Знамята Хатылыбыт сиригэр кун бэҕэһээ тиийэн кэллэ. Аҕа дойду Улуу сэриитигэр хорсун быһыы, төрөөбүт дойдуга муҥура суох таптал, ытык бэлиэтинэн буолбут Кыһыл Знамяны байыаннай дьайыы кыттыылаахтара — Петр Романович Сивцев, Илья Ильич Слепцов, Василий Владимирович Монастырев күөрэччи тутан киллэрбиттэрин мустубут дьон сүһүөххэ туран көрүстүлэр.

Үөрүүлээх миитиҥҥэ Хатылы нэһилиэгин баһылыга Попов Вячеслав Егорович, Чурапчы улууһун баһылыгын социальнай боппуруостарга солбуйааччыта Мария Филипповна Кронникова эҕэрдэлэрин уонна үтүө баҕа санааларын эттилэр. Улуу Кыайыы Знамята кэнчээри ыччаты сырдыкка, кыайыыга-хотууга, дойдуга бэриниилээх буолууга сирдиэҕэ диэн эрэнэллэрин биллэрдилэр.

Салгыы «Кыайыы Знамята» эстафетатын Таатта улууһа көрсүөҕэ. Ити курдук, Улуу Кыайыы 80 сылын көрсө өрөспүүбүлүкэ бары улуустарын кэрийэн, ыам ыйын 9 күнүгэр Дьокуускайга Кыайыы кыһыл былааҕа кытыаста тэлимниэҕэ.