Хатылынская модельная библиотека

Олоҥхо тыла саха омук бастыҥ баайа, кэрэ киэргэлэ үйэлэри уҥуордаан кэлбит албан айымньы.

Олунньу 13 күнүгэр, Хатылы нэһилиэгэр, төрөөбүт тыл, сурук-бичик күнүн көрсө уонна нэһилиэкпит, олорон ааспыт, биллиилээх олоҥхоһуттара Кривошапкин А.Н.-Нуора Өлөксөй 155, Белых М.И.-Мэхээчэ 145, Иустинов Г.Г.- Ньоҕойоон уола 125, ыһыах ыһааччы Платонова У.Е.- Уус Ылдьаана 180 сылларын бэлиэтиир тэрээһиннэр чэрчитинэн «Хатылы нэһилиэгэ — олоҥхо киэҥ киэлитэ» төгүрүк остуолга дьон-сэргэ тоҕуоруһа муһунна. Бу тэрээһин сүрүн сыалынан быйыл улуустааҕы «Олоҥхо ыһыаҕа-2025» Хатылыбыт сиригэр ыытылларынан үбүлүөйдээх олоҥхоһуттарбытын олохтоохторго, кэнчээри ыччаппытыгар билиһиннэрии, сырдатыы буолла.

Кэлбит ыалдьыттары, тэрээһин кыттыылаахтарын «Алгыс» эбээлэрбит түмсүүлэрэ алгыстаах алаадьынан, арыылаах саламаатынан айах тутан көрүстүлэр. Тэрээһини СӨ култууратын туйгуна, Көһөрүллүү түмэлин салайааччыта М.В.Чичигинарова салайан ыытта.

Дм. Дм. Попов салайааччылаах Чурапчы улууһун Олоҥхо киинин үлэһиттэрэ бары кэлэн кыттыыны ылбыттара ыытыллыбыт дьаһалбытын өссө күүркэтэн үрдүк таһымнаата. Культура управлениятын начальнига Гуляев П. Е. бэйэтинэн тахсан этэн-тыынан сүргэбитин көтөхтө.
Бары убаастыыр, ытыктыыр Мария Петровна Иустинова баар буолан элбэҕи билэбит-көрөбүт олоҥхо киэҥ киэлитигэр халбаҥнаабакка киирэбит.

Үбүлүөйдээх олоҥхоһуттарбыт тустарынан ахтыы онорбут, олорон ааспыт олохторун сырдаппыт хаан уруу аймахтара, сиэннэрэ, хос сиэннэрэ тус сыалларын ситтилэр, кэрэ кэпсээннэринэн дьону умсугуттулар.
«Ньургуһун» уһуйаан иитээччилэрэ (уһуйааччы Р.М.Попова) «Дьырыбына Дьырылыатта» П.Ядрихинскай олоҥхотуттан толоруулара олуһун диэн киэргэттэ .
Үүнэр ыччаты фольклорга уһуйааччы Захарова А. Ф. үөрэтэр оҕолоро Кривошапкина Нарыйаана Кривошапкин А.Н. -Нуора Өлөксөй «Хара дьоруо аттаах Хара Ньургун бухатыыр» уонна Максимова Кристина М.И.Белых — Мэхээчэ «Ала Хотоҕой» олоҥхолоруттан толорон кэлбит дьону «Ноо!» дэтэн сэҥээриини ыллылар.