«Кэрэ кэрэхсэбиллээх түһүлгэтэ»
Бэс ыйын 15 күнүгэр Хатылы нэһилиэгиттээн төрүттээх биллэр олоҥхоһуттар Кривошапкин А.И. — Нуора Өлөксөй-155, Белых М.Н. -Мэхээчэ-145, Устинов Г.Г.- Ньоҕойоон уола — 125, ыһыах ыһааччы, тимир, көмүс ууһа, дэгиттэр талааннаах Платонова У.Е.- Уус Ылдьаана — 180 үбүлүөйдээх сылларыгар анаммыт бэһис төгүлүн ыытыллыбыт улуустааҕы олоҥхо ыһыаҕар «Кэрэ кэрэхсэбиллээх түһүлгэтэ» Хатылы уран тарбахтаахтарын быыстапката тэниччи тардылынна. Ол курдук, түһүлгэҕэ киирии аартыктан саҕалаан, хатыҥ чэчирдэр быыстарынан биллэр худуоһунньук Николай Колесов айылҕаны дьүһүйбүт хартыыналарын туруорбута,
СӨ Култуура туйгуна, РФ худуоһунньуктарын айар сойууһун чилиэнэ, кыраайы үөрэтээччи, үйэтитээччи Г.Г.Турантаев 33 олоҥхоһуттар, олоҥхону толорооччуларын мэтириэттэрин уонна В.Иохельсон түһэрбит хаартыскатыттан быһа тутан Уус Ылдьаана мэтириэтин үкчү түһэрэн уруһуйдаан көрдөрүүгэ туруорбута кэлбит дьон кэрэхсии көрдүлэр.
Бу нэһилиэктэн төрүттээх үс ини-бии Николай-Боло Уус, Дмитрий, Семен Аржаковтар саха былыргы боотурдарын таҥастарын, сэбиргэллэрин, саха төрүт мусукаалынай инструменнарын о.д.а. былыргы үйэтээҕи малы-салы аҕалан тэниччи тардан оҥоһуктарын билиһиннэрдилэр, сырдатан кэпсээтилэр.
Улуустааҕы киин бибилэтиэкэ үлэһиттэрэ Чурапчыга улууһугар , Хатылыга олорон ааспыт олоҥхоһуттары, олоҥхолорун сырдатар кинигэлэри туруордулар,
РФ, СӨ норуотун маастара Дария Козлова салайар түмсүүтэ «Дьулуруйар Ньургун Боотур» кырадаһынынан тикпит паннотун эдэрдиин-эмэнниин сэргии, сөҕө көрдүлэр,
нэһилиэк тумус туттар олохтооҕо Мария Иустинова олоҥхоҕо анаан кылынан, сиэлинэн өрбүт паннота, ону тэҥэ ат чаппарааҕа, олоҥхоһут Ньоҕойоон Уолун сыдьаана Василий Иустинов кэргэнинээн сиэдэрэйдээн оҥорбут ат ыҥыыра, туос паннолар көрбүтү эрэ умсугутта.
Ону тэҥэ, нэһилиэкпит биллэр уустара, уран тарбахтаахтара көрүөхтэн эриэккэс оҥоһуктарын, кэрэ бэйэлээх үлэлэрин аҕалан көрүүгэ туруордулар, ыһыах дьонугар көрдөрөн тэниччи тартылар. Ыалдьыттарга өйдөбүнньүк сувенирдары, уустар оҥоһуктарын атыылаһар-атыылыыр эйгэ тэрилиннэ.
