Саха омук сүдү айымньыта ОЛОҤХО
Олоҥхо — саха норуотун тылынан уус-уран айымньытын муҥутуур чыпчаала, үйэттэн үйэҕэ, көлүөнэттэн көлүөнэҕэ бэриллибит дириҥ ис хоһоонноох баайа.
2006 сыллаахха ЮНЕСКО иитинэн Олоҥхо Аан дойду култууратын шедевринэн билиниллэн, үйэтитии. харыстааһын, киэҥ эйгэҕэ таһаарыы үлэтэ барар. Оччотооҕу кэмҥэ Саха сирин бэрэсэдьиэнэ В.А.Штыров уурааҕынан сэтинньи 25 күнэ Олоҥхо күнүнэн биллэриллибитэ.
Саха сирин үрдүнэн сэтинньи 25- ахсынньы 5 күнүгэр диэри Олоҥхо декадата арыллан үгүс тэрээһиннэр ыытыллаллар. Ол курдук, Хатылыга сэтинньи 26 күнүгэр сылын аайы ыытыллар «Олоҥхо дьыктаана» акцияҕа «Ньургуһун» уһуйаан иитээччилэрэ көхтөөх кыттыыны ыллылар. Быйылгы сорудахха И.И.Бурнашев- Тоҥ Суорун «Сылгы уола Дыырай бухатыыр» диэн олоҥхотуттан быһа тардыыны суруйдубут. Тэрээһин иннинэ бибилэтиэкэ үлэһитэ Мария Максимова Олоҥхо күнүн, олоҥхо уус-уран айымньы быһыытынан суолтатын сырдатта.
Эмиэ бу күн, В.С.Соловьев- Болот Боотур аатынан Хатылы орто оскуолатын үөрэнээччилэригэр уонна үлэһиттэригэр олоҥхону толорооччу, 2025 с. Ил Дархан степендиата, Нерюнгри куоракка ыытыллыбыт Олоҥхо ыһыаҕын Кылаан кыайыылааҕа С.В.Лазарева Олоҥхону истии эйгэтин «Мааны ыалдьыт» диэн анал бырайыак хаамыытынан сылдьан киэҥ биһирэбили ылла. Ону тэҥэ Хатылы сиригэр-уотугар олорон ааспыт «Хатылы олоҥхоһуттара» кинигэ быыстапката тардылынна.
