«Туос тойуга»
Быйыл Арассыыйаҕа норуоттар сомоҕолоһууларын, Өрөспүүбулукэбитигэр култуура, улууспутугар олохтоох оҥорон таһаарыы сылларын чэрчитинэн «Айхаллан Чурапчы» сылын аайы ыытыллар уус-уран самодеятельноһы көрүү бэстибэлээлэ Хатылы нэһилиэгэр кулун тутар 13 күнүгэр үрдүк таһымҥа буолан ааспыта. Тэрийээччилэр быйылгы сылга туос оҥоһук быыстапкатын туруорарга ирдэбил туруоран, нэһилиэк ааттаах-суоллаах маастардара, ону тэҥэ саҥа саҕалааччылар олус сиэдэрэй оҥоһуктарын дьон-сэргэ көрүүтүгэр туруордулар.
Быыстапка балаһыанньатынан хас биирдии нэһилиэктэн саар ыаҕаһы оҥорон таһаарыы ирдэниллибитэ. Саар ыаҕас — улахан, киэҥ истээх, элбэх үүтү-сүөгэйи, кымыһы хаһаанарга аналлаах олус сиэдэрэй тигиилээх ыаҕас көрүҥэ. Биһиги нэһилиэкпит олохтооҕо, СӨ Норуотун маастара Александра Петровна Попова бэрт кылгас кэмҥэ кэрэ бэйэлээх, быыстапка муҥутуур оҥоһугун оҥорон улахан сэҥээриини ылыан ылла.
Саха иһитэ-хомуоһа, туттар тэрилэ былыр барыта айылҕаттан бэйэтиттэн ылыллан айыллыбыттара. Ханнык да омуктааҕар туоһу элбэхтик уонна сатабыллаахтык тутталлара. Туос тордуйаттан саҕалаан өбүгэлэрбит олохторун дала туоһу кытта ыкса ситимнээх: олорор дьиэтэ, аһыыр иһитэ, эмэ-томо, туттар тэрилэ, бэл диэтэр бултуур тэрилэ, оннооҕор саптар суорҕана кытта туос буолара үһү. Өбүгэлэрбит айылҕаны олус таптыыллара.
Оту-маһы кытта дууһалыын, сүрэхтиин, санаалыын дьүөрэлэһии бу быыстапкаҕа толору көһүннэ, киһи хараҕа хайҕыыр бэртээхэй оҥоһуктар оҥоһуллан тахсан үрдүк сыанабылы, сэҥээриини ылла.
