«Комсомол мин сүрэхпэр…»
Биһиги эһэлэрбит, эбэлэрбит, аҕаларбыт, ийэлэрбит, убайдарбыт , эдьиийдэрбит — ааспыт үйэҕэ үлэни, үлэһит киһини өрө тутан үүнэн -сайдан кэлбит көлүөнэ. Сэбиэскэй былаас олохтонуоҕуттан комсомоллар артыаллары, табаарыстыбалары, колхозтары бастакынан бэйэлэрэ чилиэнинэн киирэн тэрийбиттэрэ. Колхоз сайдыытыгар, күнү-дьылы аахсыбакка, күүстээх үлэҕэ Комсомол туруммута. Дойдуну сайыннарыыга Комсомол ударнай тутуунан заводтары, фабрикалары, гидроэлектростанциялары, саҥа куораттары тутууга, кырыс, оһорбо сирдэри туһаҕа таһаарбыта, дойду экономиката сайдарыгар тимир суоллары туппута. Аҕа дойду көмүскэлигэр тыылга хаалбыт комсомолецтар күнүстэри-түүннэри оборона туһугар үлэлээбиттэрэ. Комсомолка кыргыттар сэриигэ барбыт үөлээннээхтэрин солбуйан тракторист, суоппар идэтин баһылаан, колхоз производствотыгар таһаарыылаахтык үлэлээбиттэрэ.
Сэрии кэнниттэн дойдуну чөлүгэр түһэриигэ комсомоллар күүстээх үлэҕэ туруммуттара. Сахабыт сирин көмүстээх Алданыгар промышленноһы сайыннарыыга, түҥ тайҕаҕа алмаазтаах Мирнэйи тутууга, Байкал-Амур магистралын, Аччыгый БАМ-ҥа, Амма өрүс кырыс сирдэрин туһаҕа таһаарыыга, кэлиҥҥи көлүөнэ комсомолецтар эстафетаны тутан үрдүк таһаарыылаахтык үлэлээбиттэрэ. Колхоз, совхоз производствотыгар үрүҥ илгэни үрүлүтүүгэ, сыалаах эти дэлэтиигэ эмиэ ыччат, Комсомол быһаарар күүс буолбута. Кылааһынан фермаларга иккилии сыл дуогабардаһан үлэлии тахсыы — элбэх көлүөнэ орто оскуоланы бүтэрээччилэргэ үтүө үгэһинэн буолбута. Социалистическай куоталаһыынан күүрдүллэн үрдүк кирбиилэр ситиһиллибиттэрэ. Бу манна барытыгар октябрьскай, пионерскай, комсомольскай тэрилтэлэр оҕо саастан үлэни таптыырга, сатаан үлэлииргэ уһуйуу, иитии оруолу ылбыта. Оскуолаҕа саҥа киирбит оҕо октябренок буолан, коллективизм тыыныгар уһуйуллара, пионерга иитиллэрэ, үрдүкү кылаастан Комсомол буолан Ийэ дойдутугар муҥура суох бэриниилээх патриот, майгы-сигили өттүнэн ыраас, чиэһинэй, үтүөҕэ-кэрэҕэ тардыһыылаах, үлэни таптыыр буолан, оскуоланы бүтэрэн олох суолугар хардыылыыллара.
Саха сирин комсомола тэриллибитэ 105 сылын көрсө Е.Д.Доҕордуурап аатынан олохтоох бибилэтиэкэҕэ «Комсомол төлөннөөх сүрэҕэ» диэн тэрээһин ыытылынна. Истиҥ көрсүһүүгэ урукку комсомолецтар мустан, биктэриинэҕэ кыттан, ыллаан-туойан, эдэр саастарын эрчимнээх сылларын санаһан ирэ-хоро кэпсэтэн, астынан тарҕастылар.
