Гавриил Иванович Макаров-Дьуон Дьаҥылы
«Саҕах ойуур ыллыгыттан,
Сааскы киэһэ арылыттан
Сарсыардааҥҥы көмүс күннүү,
Сардаҥанан төгүрүҥнүү
Доҕоччугуом, ойон таҕыс,
Доҕоччугуом, таҕыс, таҕыс!»
Дьуон Дьаҥылы
Бүгүн олунньу 27 күнүгэр бары сөбүлүүр, ытыктыыр поэппыт уонна тылбаасчыппыт, «Ол мин дойдум Чурапчы» Чурапчыбыт улууһун гимнын тылын ааптара, Аҕа дойду Улуу сэриитин кыттыылааҕа, ССРС суруйааччыларын сойууһун чилиэнэ, Улуу Пушкин «Евгений Онегин» романын сахалыы саҥардыбыт Макаров Гавриил Иванович-Дьуон Дьаҥылы төрөөбүтэ 110 сыла.
Дьуон Дьаҥылы 1914 сыллаахха Чурапчы улууһун Болтоҥо нэһилиэгин биир уһук алааһыгар Кындалга орто бааһынай кэргэнигэр төрөөбүтэ. Макаровтар олох бары сиэрин-туомун тутуһан олорбуттара. Дьону мунньан олоҥхолотуу, кыһыҥҥы уһун киэһэлэргэ остуоруйалааһын бу дьиэ кэргэн олоҕун аргыһа этэ. Гаврил ситиһиилээхтик, умсугуйан туран үөрэммитэ. Уустук олохтон үлэни кыайар-хотор буола улааппыта. Кини оҕо сааһыттан поэзияҕа тардыстыылааҕа. Норуотун ырыатын матыыбыгар дьүөрэлии хоһооннору этэн субурутара, хоһоону айыыга дьоҕурдааҕын биир дойдулаахтара эрдэттэн бэлиэтии көрбүттэр. Нууччалыы олус үчүгэйдик суруйара эбит.
Чурапчы 7 кылаастаах оскуолатын бүтэрэн, учууталлаары кууруска үөрэммит. Болтоҥо, Соловьев, Бахсы, Кытаанах оскуолаларыгар үлэлиир. Эдэр киһи учууталлаабыт сиригэр литературнай куруһуогу тэрийэрэ. Дьоҕурдаах оҕолору түмэрэ.
Олоҕун олуктарыттан:
Дьуон Дьаҥылы 18 сааһыттан (1932 с.) айымньылара бэчээттэнэн барбыттар.
1936 с. — Бастакы хомуурунньуга «Төрөөбүт күүлэбэр» күн сирин көрбүтэ.
1943 сыллаахха Чурапчы оройуонун военкоматынан Кыһыл Аармыйаҕа ыҥырыллан, Забайкальскай фроҥҥа 152-с СП, 94-с СД сулууспалаан, ССРС—Япония сэриитигэр кыттан «Бойобуой өҥөлөрүн иһин» мэтээлинэн наҕараадаламмыта.