Попов Семен Андреевич-Сэмэн Тумат
Саха Өрөспүүбүлүкэтин норуодунай суруйааччыта, Саха Өрөспүүбүлүкэтин култууратын үтүөлээх үлэһитэ, П.А.Ойуунускай аатынан Судаарыстыбаннай бириэмийэ лауреата, Н.Е.Мординов аатынан Ил Дархан бириэмийэтин лауреата, Арассыыйа улахан литературнай бириэмийэтин лауреата,
поэт, прозаик, кириитик, суруналыыс, тылбаасчыт, литератураны ырытааччы Семен Андреевич Попов – Сэмэн Тумат быйыл олунньу 23 күнүгэр 80 сааһын томточчу туолбут үбүлүөйдээх күнүнэн, ытык киһибитин эҕэрдэлиибит!
Сэмэн Тумат баай ис хоһоонноох олоҕу олордо. Кини төрөппүттэрэ Чурапчы көһөрүүтүн дьоно. Улуу сэрии сылларыгар Булуҥ улууһугар тиийэн 1944 сыллаахха олунньу 23 күнүгэр Сэмэни төрөппүттэр. Кэлин, биһиги тапталлаах суруйааччыбыт Сэмэн Тумат муора арыытыгар ааспыт оҕо сааһын эмиэ да астына, эмиэ да сонньуйа бэйэтин ураты тыыннаах айымньыларыгар сиһилии кэпсээбитэ. Көһөрүү ыар тыына Арктика ураты эйгэтин арыйбыт суруйааччыбытын тыйыс айылҕатынан тургутан ииппитин «Муора арыытыгар олох», «Туундара оһоҕо», «Улуу кыыл тыына», «Тоотук муоратааҕы сырыылара», «Дорообо Арктика», «Оҕо сааһым хоптото», «Хотугу дойду хонноҕуттан», «Таба саха сиригэр хайдах кэлбитэй?» айымньыларыгар билсэн сөҕөбүт.
Ытыктабыллаах Семен Андреевич, доруобай-чэгиэн сырыт, уһун үйэлэн, айар үлэн абылаҥа арахсыбатын, салгыы айа-тута сырыт, саҥаттан саҥа дьоҥҥор-сэргэҕэр тирэх буолар айымньылары күүтэбит. Биһиги Эйиэхэ, киэн туттар айар киһибитигэр сүгүрүйэбит. Айар үлэн, талаанын бүүс-бүтүннүү кэлэр көлүөнэ төрөөбүт — төрүт тылын билэригэр, дойдутун таптыырыгар, анаабыт олоҕуҥ барыбытыгар үтүө холобур, бар дьоҥҥо, норуокка үгүс сыллар тухары уостан түспэт номох буолаллар.