Ыам ыйын 9 күнэ. Улуу Кыайыы 81 сылын Хатылы нэҺилиэгэ түмсүүлээхтик көрүстэ.
Быйылгы Улуу Кыайыы 81 сылыгар анаммыт “Уруйдан Улуу Кыайыы” тэрээһин ыам ыйын 8 күнүгэр «Өспөт тыыннаах полк” сэлэлээн хаамыы, нэһилиэк тэрилтэлэрин үлэһиттэрин, оскуола үөрэнээччилэрин, сэрии уонна тыыл бэтэрээннэрин дьиэ кэргэттэрин, сэрии сылын оҕолорун, анал байыаннай дьайыы кыттыылаахтарын сыллата түмэр. Сэлэлээн хаамыы кыттыылаахтара киин уулуссанан Кыайыы Знамятын уонна дойдубут былаахтарын В.С.Соловьев-Болот Боотур аатынан Хатылы орто оскуолатын үөрэнээччилэрэ күөрэччи тутан Кыайыы скверигэр киирдилэр.
Улуу Кыайыы өрөгөйдөөх күнүнэн Хатылы тыа сирин түөлбэтин баһылыга В.Е.Попов, Анал байыаннай дьайыыга кытта сылдьар уолбут Т.К.Кириллов, улуустааҕы биир кэлим диспетчерскай сулууспа начальнига И.Г.Капрынов, кэлэр кэскиллэрбит, оскуола оҕолорун ааттарыттан М.Кривошапкин эҕэрдэ тылларын эттилэр, үтүө баҕа санааларын тиэртилэр. Үөрүүлээх күҥҥэ сэрии сылын оҕолоругар, анал байыаннай дьайыы кыттыылаахтарыгар уонна кинилэр дьиэ кэргэттэригэр өйдөбүнньүк бэлэхтэри туттардылар.
Биһиги геройдарбытыгар, кыайыы иһин сэрии толоонугар тыыннарын толук уурбут буойун саллааттарбытыгар ытыктабылларын биллэрэн тыыннаах сибэкки дьөрбөтүн уурдулар, биир мүнүүтэ иһийэн турдулар.
Аан дойду устуоруйатыгар улахан сабыдыаллаах, ыар сүтүктээх, харах уулаах уонна Өрөгөй үктэллээх Улуу Кыайыы суолтата хаһан баҕар Ытык өйдөбүл буолан барыбытын сомоҕолуур. Умнуллубат үтүө күн ырыанан, үҥкүүнэн доҕуһуолланна, парад кыттыылаахтара хаартыскаҕа түһэн үйэтитилиннилэр. Оскуола уонна олохтоох дьаһалта көҕүнэн саллаат кухнята тэрилиннэ. Нэһилиэк түөлбэлэрин икки ардыларыгар Кыһыл Знамя орден кавалера, командир, снайпер Е.Д.Доҕордуурап 110 сылыгар анаммыт сыал ытыытын күрэҕэ, Кыайыы эстафетата ыытылынна. Маны тэҥэ, “Ааспыт умнуллубат…!” сэрии сылын оҕолоругар, аҕам саастаах дьоммутугар истиҥ көрсүһүү тэрилиннэ.
Кыайыы умнуллубат! Умнубат сир Ийэ дойду! Ким да умнуллубат, туох да умнуллубат! Бу сырдык бырааьынньык биьиги сурэхпитигэр, өйбүтүгэр –санаабытыгар модун санаа кыайыытын туоһулуур, сэрии, тыыл бэтэрээннэригэр сүгүруйэр махтал кунэ барыбытыгар сырдык эрэли саҕан, этэҥҥэ буолууну, эйэлээх халлааны түстүү турдун.
