«Истиҥ иэйии» -улуустааҕы уус-уран оҥоһук уонна коллекционердар быыстапкалара.
Чурапчытааҕы инбэлииттэр уопсастыбаларын салаата Хатылы нэһилиэгин «Дьулуур» доруобуйаларынан хааччахтаах дьон түмсүүтүн салайааччыта Барашкова А.С. көҕүлээһининэн, бу дьыл муус устар 15 күнүгэр Е.Д.Доҕордуурап аатынан Хатылы нэһилиэгин олохтоох библиотекатыгар «Истиҥ иэйии» диэн улуустааҕы уус-уран оҥоһук уонна коллекционердар быыстапкалара буолан ааста. Тэрээһиҥҥэ улууспут 5 нэһилиэгиттэн доруобуйаларынан хааччахтаах дьон салайааччыларын, социальнай харалта сүрүннүүр үлэһиттэрин кытта кэлэн бэйэлэрэ оҥорбут араас оҥоһуктарын, өр сылларга муспут малларын дьоҥҥо-сэргэҕэ көрдөрөн, уопут атастаһан, ыкса билсэн, кэпсэтиһэн бэрт сэргэхтик, дуоһуйа бириэмэлэрин атаардылар.
Уопсастыба күүстээх санаалаах, инникигэ дьулуурдаах дьонноох буолан, өрөспүүбүлүкэ, улуус таһымнаах күрэхтэһиилэргэ, улуус уопсастыбаннай олоҕор мэлдьи кыттар, атыттарга үтүө холобур буолар.