Ыам ыйын 22 күнэ — сааскы Ньукуолун күнэ.
Ньукуолун — православнай культураҕа сибэтиэй Нико́ланы (Чудотворец,ве́шний) өйдүүр күн — илин уонна арҕаа славяннар, молдаваннар уонна румыннар өйдүүр күннэрэ. Ыам ыйын 9(22) күнүгэр ылыллар. Россия Православнай сиэркэбэ этэринэн Николай Чудотворец XI үйэ бүтүүтүгэр уҥуоҕун Бари куоракка көһөрбүтүн чиэһинэн бэлиэтэнэр.
Саха сиригэр православнай бырааһынньыктартан, сахаларга күөххэ үктэнэр биир ордук улахан суолталаахтык бэлиэтэнэр. Ньукуолуну сахалар сайын саҕаланыытын курдук бырааһынньыктыыллар. Бу күн айылҕаны кытта ситимнэһэр, көмүскэл көрдөһөр, инники олоҕу түстүүр, улахан баҕа санаабыт туоларын туһугар Аар айылҕаттан көрдөһөр күммүт. Сайылыкка көһөр бириэмэ чугаһыыр.
Ньукуолуну көрсө Хатылы нэһилиэгэр «Көмүөл» эр дьон түмсүүтэ, нэһилиэк салалтатын тэрээһининэн, аҕам саастаах дьоммутугар уонна анал байыаннай дьайыыга сылдьар ыччаттарбыт төрөппүттэригэр, дьиэ кэргэттэригэр Баай Байанай «дук» гыммыт сааскы бултарыттан бэрсэр үгэстээхтэр. Онон сааскы булка кыайан сылдьыбат дьоммут кус амсайан үөрүөхтэрэ,Ньукуолун күн хас ыал аайы алаадьы минньигэс сыта тунуйуо.
