Хатылы нэһилиэгэр “Мааны ыалдьыт” олоҥхону истэр күн буолан ааста.
“Төрөөбүт тыл биһигэ” киин көҕүлээһининэн “Мааны ыалдьыт” диэн Олоҥхо киинин бырайыагынан олоҥхону истии тэрээһинэ Самаан сайыны айхаллыы, Оҕо көмүскэлин күнүн көрсө “Түөлбэбэр Олоҥхо дуорайар” аһаҕас халлаан анныгар ураты, солун тэрээһин бэрт сэргэхтик буолан ааста.
Кэлбит ыалдьыттары сылаас алаадьынан, арыылаах саламаатынан айах тутан, буруолатан көрүстүбүт. Кыттыыны ыллылар нэһилиэкпит кэскиллээх олоҥхону толорооччулара, Республика региональнай, улууснай күрэх кыайыылаахтара “Молодежнай”, “Таатта” түөлбэҕэ Кривошапкина Нарыйаана А.Н.Кривошапкин «Хара дьоруо аттаах Хара Ньургун бухатыыр», Кривошапкин Кирик П.А.Ойуунускай «Дьулуруйар Ньургун Боотур». “Сугулаан”, “Стадион” түөлбэҕэ Максимова Кристина М.Белых «Ала хотоҕой», Захаров Витя «Дьулуруйар Ньургун Боотур» олоҥхолоруттан быһа тардан толордулар. Ону таһынан дэгэрэн ырыалары толорон киэргэттилэр Максимова Таня уонна Захаров Витя. Олоҥхо толоруутун үтүө үгэһин илдьэ сылдьар салайааччыларынан, уһуйааччыларынан буолаллар Попова Розалия Михайловна уонна Захарова Анастасия Федотовна.
Олоҥхо толорууларын сэргии, кэрэхсии истэн баран 7 кылаас үөрэнээччитин Прокопьева Карина уонна “Көһөрүллүү” түмэлин салайааччытын Чичигинарова Марфа Владимировна таһаарыыларыгар бука бары оһуохайдаан, сахалыы оонньуулары үөрэ-көтө оонньоон тарҕастыбыт.
Кыттыыны ылбыт оҕолорбутугар, салайааччыларга барҕа махтал буоллун. Инникитин өссө да үүнэ-сайда турун, ситиһиилэри баҕарабыт.