Арассыыйаҕа дьиэ кэргэн, таптал уонна бэриниилээх буолуу күнэ.
От ыйын 8 күнүгэр Арассыыйаҕа дьиэ кэргэн, таптал уонна бэриниилээх буолуу күнэ.
Күндү Хатылыбыт нэһилиэгин дьоно-сэргэтэ! Бука барыгытын бу бүгүҥҥү бэлиэ күнүнэн ис сүрэхтэн эҕэрдэлиибин! Хас биирдии ыалга или-эйэни, уостубат тапталы, бигэ туругу, толору дьолу баҕарабын!
Биһиги өрөспүүбүлүкэбитигэр дьиэ кэргэн үгэстэригэр ураты сыһыан баар. Төрөөбүт дойдуга таптал, аҕа саастаах дьоҥҥо ытыктабыл. Дьиэ кэргэҥҥэ төрөппүттэри кытта үлэлээн-хамсаан, айан-тутан олорууга, ийэ амарах санаатыттан, аҕа эрэллээх уонна күүстээх киһи буоларын өйдөбүлүттэн саҕаланар. Дьиэ кэргэн — бу олох, киһилии быһыы-майгы уонна патриотизм бастыҥ оскуолата, манна оҕо киһи быһыытынан сайдарыгар бөҕө акылаат түһэриллэр.
Саха сирин дьоно үйэлэр тухары кэлбит олоҕу-дьаһаҕы тутуһан, дьиэ кэргэн тэринэн, удьуордарын утумун салгыыллар, үйэлэр тухары мунньуммут ураты култуураларын, билиилэрин-көрүүлэрин, уопуттарын оҕолоругар иҥэрэллэр. Өрөспүүбүлүкэ бастакы бэрэсидьиэнэ Михаил Николаев көҕүлээһининэн 90-с сылларга саҕаламмыт дьиэ кэргэни өйүүр ситимнээх үлэ өрөспүүбүлүкэҕэ тиһиктээхтик ыытыллар.
Биһиги бүгүн элбэх оҕолоох улахан дьиэ кэргэн күн күбэй ийэтин Марина Семеновна Кривошапкина сөбүлүүр солун,сэдэх дьарыктарын туһунан сырдатарбытын көрүн, сэргээн, тускутугар туһаныҥ!
Марина иллэҥ кэмигэр остуоруйалар, ойуулуктар геройдарыттан талан, таҥаска акриловай кырааскалары, «Маркер для ткани» заказтаан, атыылаһан араас өҥнөрү туһанан оҕолорун футболкаларыгар, ыстааннарыгар бу курдук уруһуйдаан ойуулуур.
Аны тэлгэһэтин иһигэр, оҕолор оонньуур сирдэригэр киэргэтэн бу курдук эргэрбит сымнаҕас оонньуурдары бырахпакка сиэмэн материалын бэлэмнээн, илиитин иминэн ньалҕаархай гына хос-хос сыбаан, үчүгэйдик куурдан баран акриловай өҥнөөх кыраасканан кырааскалаан кэрэ көстүүлээх гына оҥорон таһаарар.
Уонна кэрэчээн кыргыттарыгар, бэйэтигэр оҕуруонан сахалыы симэхтэри, киэргэллэри оҥорорун туохтааҕар да ордорор.
Бу курдук Марина күннээҕи түбүктэн быыс булан нэһилиэккэ, оскуолаҕа, уһуйааҥҥа ыытыллар куонкурустарга араас материалтан сувенирдары, оонньуурдары оҥорон, тигэн, маастар кылаас ыытан куруутун көхтөөхтүк кыттар. Бэлэххэ, атыыга диэн сакааһынан эмиэ оҥорор.
Элбэх оҕолоох ыал ийэтэ Марина араас иэйиилээх, айар алыптаах дьарыктара үксүү турдуннар, талаана арыллан истин диэн баҕа санаабытын тиэрдэбит. Дьиэ кэргэнигэр чэгиэн доруобуйаны, дьолу баҕарабыт. Көмүс ньээкэ уйаҕыт өрүүтүн сылааһынан илгийдин, оҕо туруктаах уйулҕатын биһигэ буолуохтун!
Көрсүөххэ диэри!