Хатылылар — Кыһыл Знамя эстафетатын туттулар
Бу күннэргэ Саха сирин үгүс улуустарыгар буоларын курдук, бүгүн Чурапчы улууһун Хатылы нэһилиэгэр биир олус суолталаах, дириҥ ис хоһоонноох дьаһал ыытылынна. «Сэрии, тыыл уонна үлэ бэтэрээннэрин сэбиэттэрэ» общественнай түмсүү тэриллибитэ 40сылыгар аналлаах өрөспүүбүлүкэтээҕи эстафета кэрийэ сылдьар Кыһыл Знамята Мырыла нэһилиэгиттэн тиийэн кэллэ.
Бу үбүлүөйдээх эстафета – хас да көлүөнэни ситимниир сүдү өйдөбүнньүк буолар. Аҕа дойду Улуу сэриитин, тыылга, фроҥҥа көмөнү, эйэлээх кэмҥэ норуот хаһаайыстыбатын чөлүгэр түһэриини итиэннэ бэрээдэги араҥаччылааччылары, ааспыт көлүөнэ хорсун быһыытын үйэтитии, эдэр ыччакка тиэрдии диэн сыаллаах ыытыллар.
Тэрээһиҥҥэ кэлбит ыалдьыттары, биир дойдулаахтарбытын, оҕолору «Далбар» дьахтар түмсүүтэ арыылаах саламаатынан, итии чэйинэн, «Дьоһун саас» пенсионердар түмсүүлэрэ минньигэс алаадьынан күндүлээтилэр, «Нэһилиэкпит бэтэрээннэрэ» быыстапканы сэргии көрдүлэр, Болот Боотур аатынан Хатылы орто оскуолатын 8кылааһын үөрэнээччилэрэ «Сыыппаралар чахчыны кэпсииллэр» нэһилиэкпит историятыттан сырдаттылар, 4 кылаас үөрэнээччилэрэ ырыанан киэргэттилэр.
Салгыы Кыһыл Знамя эстафетата чугастааҕы Болтоҥо нэһилиэгэр айанныаҕа.