Балаҕан ыйын 3 күнэ — Милитаристскай Японияны Кыайыы күнэ уонна Иккис аан дойду сэриитэ түмүктэммит күнэ.
Бу күн аан дойду үрдүнэн, Арассыыйаҕа, ол иһигэр Саха Сиригэр Япония урусхалламмыта уонна Иккис аан дойду сэриитэ тохтообут күнүнэн ситимнээн өйдөбүнньүк, кэриэстэбил, сүгүрүйүү күнэ буолар.
Уһук Илиҥҥэ байыаннай дьайыыларга биһиги норуоппут кыайбыта 79-с сылыгар, биһиги бүгүн Ийэ дойдубутун көмүскээччилэр хорсун быһыыларын кэриэстиирбитин уонна ытыктыырбытын биллэрэбит.
Саха сириттэн 3,5 тыһыынчаттан тахса саллааттар уонна офицердар дьоруойдуу быһыыны көрдөрөн, оччотооҕу аан дойду биир саамай күүстээх аармыйатын — дьоппуоннар Императорскай аармыйаларын кылгас кэмҥэ үлтүрүппүттэрэ.
Саха сирин байыастара Забайкальскай фронт 17-с аармыйатын 278 стрелковай дивизиятын уонна 39-с аармыйатын 210-с, 94-с стрелковай дивизияларын састаабыгар бэйэлэрин чулуу пехотинец уонна бэргэн снайпер быһыытынан көрдөрбүттэрэ. Японияны кытта сэриигэ пехотанан, артиллериянан уонна кавалериянан кыттыбыттара. Кинилэр Курильскай арыылары десаннааһыҥҥа кыттыбыттара, сэрии бүтүүтүн уһансан, континентальнай чааска самурайдары үлтү сынньыбыттара.
Сахабыт сирин буойуннара сэриилэһэргэ анал үөрэхтээх, толору сэбилэниилээх, мөлүйүөн ахсааннаах Квантунскай аармыйаны кытта кырыктаах кыргыһыыга кыайыылаах тахсыбыттара.
Биһиги биир дойдулаахтарбыт аҕаларбыт, эһэлэрбит Маньчжурия, Сахалин, Курильскай арыылар, Хотугу Корея иһин уонна Кытайга Хайларскай кириэппэһи ыларга хааннаах кыргыһыыларга кыайан, тулхадыйбат албан ааттаммыттара.
Кинилэр Кыайыы туһугар хорсун быһыыларын, сырдык кэриэстэрин хаһан да умнуохпут суоҕа. Бу устуоруйа биһигини ыарахаттары туоруурга, сомоҕолоһуулаах уонна Ийэ дойдубутугар бэриниилээх буоларга үөрэтэр.
