Мин ийэ тылым — сахам тыла
Киһи тыла уоттааҕар абытай. Тыл тыыннаах, иччилээх күүс.
Айылҕа киһиэхэ көрөр, истэр, амтаһыйар дьоҕурдары сэргэ саҥарар кэпсэтэр курдук үтүөкэннээх бэлэҕи анаабыт.
Саҥарар тылбыт , айылҕаны кытта ситиммит биир дьоһун суолталаах утаҕа.
Тыл- тыыннаах күүс.
Кини кэпсэтэргэ, өйдөһөргө анаммытын таһынан, киһи санаатын сарбыйар, эрэлин эһэр, кэҕиннэрэр, тубарсытар эмиэ дьайыылаах.
Ол да иһин сахаҕа тыл сэттээх-сэлээннээх диэн сэрэтэр этии баар..
Тыл -иччилээх тыал..
Маны өйдөөн толкуйдаан туттуохха .
Мин эрэйдээх;
Ханнааҕы кыахпынан;
Дьэ иэдээн, алдьархай: Ынырык куһаҕан диэн курдук куһаҕан тыыннаах, бэйэни быһа этинэр, суланар тыллары хаһан да туттуман.
Оннук тыллаһар киһиэхэ мөкү тыал хонон, олохсуйан, куһаҕан дьайыыны ыҥырар.
Быдьар тылы туттуу киһи ис туруга мөлтөөбүтүн, өйө-санаата буомурбутун бэлиэтэ.
Мантан сылтаан киниэхэ араас ыарыы уйаланар..
Тыл сытыы кылыс.
Сэрэхтээх. Алдьатыылаах да буолуон соп.
Тустаах эрэ киһиэхэ буолбакка, истэн турааччыга эмиэ охсор дьайыылаах
Өстөөххө даҕаны, ыар буруйдаахха даҕаны, сөптөөх дьүүлү Үрдүкү Айыылар эрэ таһаарар аналлаахтар.
Онон кырыыс тылын кимиэхэ да туттуман, бэйэҕитигэр эргийиэн сөп.
Тыл ураты күүһүнэн киһини үрдүк мэҥэ халлааҥҥа көтүтүөххэ сөп эбэтэр өрүттүбэт гына самнарыахха сөп..
Тыл эмтиир, күүс эбэр кыахтаах.
Хайа да омук төрүт итэҕэлин, тылын илдьэ сырыттаҕына эрэ симэлийбэт.
Төрөөбүт тылын, өбүгэлэрин сиэрин-туомун харыстаабат омук кэскилэ кэрэгэй.
Омук быһыытынан сүрүн баайбыт — сахалыы саҥабыт, сиэрбит-туоммут уонна толкуйбут.
Сүрүн баайбыт сир анныгар буолбатах — бэйэбит испитигэр, өйбүтүгэр санаабытыгар.
Тылбытын өспүтүн, сахалыы үгэстэрбитин харах харатын курдук харыстаан, айылҕабытыттан тэйбэккэ илдьэ сылдьыахтаахпыт.
Хайа да омук төрөөбүт тылынан саҥарарын _- суруйарын, толкуйдуурун эрэ тухары баар.
Эдьиий Дора сүбэтэ..